FESK er nýtt félag Eggja-, Svína- og Kjúklingabænda


Sigmar Vilhjálmsson er talsmaður FESK

Nýtt félag um Íslenskan landbúnað.

Félög eggjabænda, svínabænda og kjúklingabænda hafa stofnað félagið FESK sem hefur það markmið að stuðla að upplýstri og ábyrgri umræðu um landbúnað á Íslandi. FESK mun verða málsvari félaganna þriggja á opinberum vettvangi og koma fram fyrir hönd félagsmanna. Stofnendur FESK vonast til að starfsemi félagsins verði öflugur liðsauki í baráttu alls íslensks landbúnaðar fyrir tilveru sinni, enda samvinna og samheldni allra búgreina mikilvæg heildinni.

„Í nútíma samfélagi er offramboð af upplýsingum og því miður eru upplýsingarnar oft harðsoðnar, stuttar og klipptar úr samhengi. Mitt hlutverk verður að létta á bændum með því að fylgjast með umræðunni og svara fyrir þá þætti sem FESK telur ekki nægilega skýra.“, segir Sigmar Vilhjálmsson, talsmaður FESK.

„Það er mikið sótt að íslenskum landbúnaði þessa dagana og það eru margir fletir á þeim málum sem þurfa að vera skýrari. Það er samfélagslega mikilvægt að ræða þessi mál án sleggjudóma. Landbúnaður snýst um samfélagið okkar, þjóðina, heilsu og náttúruvernd. Allt eru þetta málefni sem eru gríðarlega mikilvæg, ekki bara hér á landi, heldur allsstaðar í heiminum. Matvælaframleiðsla, lýðheilsa og sjálfbærni, eru stór þáttur í verkefnum allra stjórnvalda í heiminum. Ísland hefur ennþá sterka stöðu í þessum efnum og hana ber að verja. FESK mun leggja sitt af mörkum til að svo megi verða áfram.“ bætir Sigmar við.



#fesk #sigmarvilhjalmsson

FESK - Hagatorgi - 107 Reykjavík - fesk@fesk.is